Swaai jou skoonmaak-staf en maak so hardnekkige vlekke aan die binnekant van jou mikrogolfoond skoon.
As jy probeer om die tekens van verlede week se sousboontjie- of eier-‘ontploffing’ in jou mikrogolfoond te verwyder, hier is die maklikste manier om daardie ‘bewysstukke’ te laat verdwyn:
Verhit ʼn koppie water vir vyf minute op hoog in ʼn houer wat geskik is vir ʼn mikrogolfoond – die stoom van die kokende water sal dit maklik maak om enige gemors met ʼn sponsie af te vee.
Verwyder die houer en die mikrogolfoond se draaitafel; vee laasgenoemde skoon, asook die binnekant van die oond.
Maak die raamwerk ook goed skoon sodat die deur dig sluit. Spuit ʼn meerdoelige skoonmaakmiddel op ʼn lap om die buitekant en kontrolepaneel van die oond skoon te maak. Vee dan met ʼn uitgespoelde lap af.
Maak dit maklik met dié tydbesparende skoonmaakwenke:
Metode 1: Vir ’n maklike, vinnige en doeltreffende skoonmaaksessie, sny ’n suurlemoen in die helfte en druk die sap in ’n houer uit. Voeg 2 eetlepels koeksoda by en vul aan met warm water. Plaas op volkrag in die mikrogolfoond vir vyf minute. Die stoom laat die vet loskom en maklik skoonmaak.
Metode 2: Vul ’n mikrogolfoond-bestande bak met water en ’n bietjie asyn. Plaas dit op volkrag in die mikrogolfoond vir twee minute. Doop ’n sponsie in die water-en-asyn-oplossing en vee die binnekant van die mikrogolfoond daarmee uit.
Wenke: Haal die glas bord uit en was dit soos ’n gewone bord. Party kan selfs in die skottelgoedwasser gaan.
Nadat jy dit skoongemaak het, los die mikrogolfoond ’n rukkie oopsodat dit goed droog kan word.
Bron en foto: www.goodhousekeeping.co.za